АН: Хавтгайрсан халамжийг дэмждэггүй ч ахмад настнуудаа халамжлах ёстой

Улс төр

УИХ дахь АН-ын намын бүлэг тэтгэврийн доод хэмжээг нэмэгдүүлэх  хуулийн  төслийг санаачлан, өргөн барьж байгаагаа мэдэгдлээ. Энэ тухай УИХ-ын гишүүн, АН-ын бүлгийн дарга Д.Ганбат хэлэхдээ “ 270 мянган хүнийг хамарсан ач холбогдолтой хууль болох  “Тэтгэврийн доод хэмжээг нэмэгдүүлэх тухай” хуулийн төслийг АН-ын бүлэг өргөн барина. Энэ төслийг манай бүлгийн гишүүд 100 хувь дэмжсэн” гэв.

УИХ-ын гишүүн С.ОДОНТУЯА:

-Ахмадын тэтгэврийн доод хэмжээг 500 мянган төгрөгт хүргэж нэмэгдүүлэх хуулийн төслийг АН-ын бүлэг санаачлан өргөн барих гэж байна. Өнөөдөр ахмадууд 500 мянгаас доош төгрөгийн тэтгэвэр авч байгаа нь тэдний амьжиргаанд хүрэлцдэггүй. ҮСХ-ноос гаргасан статистикаар өрхийн дундаж зардал 1.1 сая төгрөг болсон. Гэтэл хоёр ахмадын тэтгэвэр  ч нийлээд амьжиргааныхаа гуравны нэгийг бүрдүүлж чадахгүй байгаа. Өнөөдөр 441 мянган ахмад тэтгэвэр авч байгаагаас тэдний 300 мянга орчим нь 500 мянган төгрөгөөс доош тэтгэвэр авч байна. Энэ нь  ахмадуудыг ядрууралд хүргэж буй гол шалтгаан. Тэдэнд хувийн өмч, хадгаламж байхгүйгээс ядууралд өртсөн. Хуулийн төсөл үндсэн долоон хэсгээс бүрдэнэ. Хуулийн төсөл батлагдсанаар стратегийн ач холбогдол бүхий ашигт малтмалын орд байгалийн баялаг ард түмний мэдэлд байх зарчимд нийцүүлэн үр өгөөжийн дийлэнх нь ард түмэнд ногдож байхаар ашиглах тухай заасан Үндсэн хуулийн 6.2 дахь хэсгийн шаардлага биелэх ахмад настнууд байгалийн баялгийн үр өгөөжөөс хүртэж амьдралын наад захын хэрэгцээгээ хангахуйц тэтгэврийн орлоготой болох нөхцөл бүрдэнэ. АН-ын хувьд хавтгайрсан халамжийг дэмждэггүй ч халамжлах ёстой хүмүүсээ халамжлах ёстой. УИХ-ын 24 дүгээр тогтоолоор стратегийн ач холбогдол бүхий ашигт малтмалын зургаан ордыг маш яаралтай эргэлтэд оруулах, үр өгөөжийг нь хүртээх шийдвэр гарсан. Иймд Цагаан суваргын ордоос ахмадын тэтгэврийн нэмэгдлийн санхүүжилтийг гаргахаар тооцсон” гэлээ.

УИХ-ын гишүүн С.ПҮРЭВДОРЖ:

-Цагаан суваргын ордыг УИХ-аас төр эзэмших шаардлагагүй гэж татгалзсан байдаг. Монголын төр Цагаан суваргын ордыг үнэтэй болгох зүйлийг хийсэн. Тэр нь төмөр замыг хажуугаар нь барьсан. Тиймээс энэ ордын үнэ цэнэ дахин 60 хувиар өссөн. Төр энэ том бүтээн бай­гуу­лалтыг хийснийхээ хувьд Цагаан суваргын тодорхой хувийг эзэмших саналыг тухайн компанитайгаа ярьж, шийд­вэрлэх хэрэгтэй. Энэ ордыг эзэмшиж байгаа компани зур­гаан жилийн хугацаанд ажил хийгээгүй байна. Тиймээс төр тодорхой хэмжээний хөрөнгө оруулалт хамтран хийж эр­гэлтэд оруулъя. Эргэлтэд оруулсан хувиасаа тодорхой хэм­жээний хөрөнгийг ахмадууддаа зарцуулах нь зөв” гэсэн юм.

Ахмадын тэтгэврийн доод хэмжээг  500 мянган төгрөгт хүргэж нэмэгдүүлэхэд жилдээ 400 орчим тэрбум төгрөг шаардлагатай аж. Нийт ахмадын гуравны нэг нь хувь тэнцүүлсэн, гуравны хоёр нь бүрэн тэтгэвэр авдаг юм байна.