Гаднын хөрөнгө оруулагчдын эрх ашгийг хохироосон хэргүүдийн жагсаалтыг аравдугаар сарын 28-нд дэлгэрэнгүй танилцуулахаар төлөвлөсөн хэмээн Хууль зүйн сайд Х.Нямбаатар Засгийн газрын ээлжит хуралдааны шийдвэрийг танилцуулах үеэр хэллээ. Тэрбээр “Монгол Улсын Ерөнхий прокурор, Тагнуулын Ерөнхий Газрын даргаар ажилласан байсан, ҮАБЗ-ийн нарийн бичгийн даргаар ажиллаж байсан хүмүүст холбогдох хэргүүдийг жагсаалтуудыг танилцуулахаар бэлдсэн. Гадаадын хөрөнгө оруулагчид монголд үйл ажиллагаагаа явуулахад монголд хамгийн таатай суурь эрх зүйн орчин бүрдүүлэх чиглэлээр гадаадын хөрөнгө оруулагчдын эрх ашгийг хамгаалах чиглэлээр байгуулагдсан ажлын хэсэг тогтмол үйл ажиллагаагаа явуулж хэвлэл мэдээллийн байгууллагад танилцуулахаа албан ёсоор хэлье.

Арбитрт хянан шийдвэрлэх ажиллагаан дээр гацсан, шүүхийн шатанд гацсан, иргэний хэргийг эрүүгийн хэрэг болгон шийдүүлсэн, бусдыг үндэслэлгүйгээр Монгол Улсаас гаргах хууль бус ажиллагаа зохион байгуулж, хар тамган даруулан хөрөнгө оруулагчийг Монгол Улс руу орж ирэхгүй болгосон гэх мэт урт жагсаалтыг танилцуулахаар бэлдэж байгаа. Засгийн газар гэмт хэрэгтэй тэмцэх үндсэн чиг үүрэгтэй. Үүний хүрээнд хэргүүдийг олон нийтийн анхааралд чиглүүлж холбогдох байгууллагуудтай хамтарч ажиллана" хэмээв. Мөн тэрбээр Эрдэнэт үйлдвэрийн асуудлаар ярихдаа "Авлигатай Тэмцэх Газраас Эрдэнэт үйлдвэрийн 49%-ийн асуудлаар мөрдөн шалгах ажиллагаа явуулж байгаа. Одоогоор 10 гаруй хүнийг яллагдагчаар татаад шалгах ажиллагаа дуусах шатандаа орж байгаа гэсэн мэдээллийг авсан. 

Мөрдөн шалгах ажиллагаа дууссан тохиолдолд хэрэг шүүх рүү шилжинэ. Шүүх рүү шилжмэгц урьдчилсан хэлэлцүүлэг явагдана. Үүний дараа гэм бурууг тогтоох шат дараалалтай ажиллагаанууд явагдахаар байгааг хэлье. АТГ хэвлэл мэдээлэл, олон нийттэй харилцах хэлтсээс тодорхой мэдээлэл авах нь зүйтэйг" хэллээ.