Монгол Улс ФАТФ-ын "Саарал жагсаалт"-аас  гарах эсэхийг шийдэх эцсийн шийд гарахын өмнөх газар дээрх шалгалт өнөөдөр өглөөнөөс албан ёсоор эхэлж байна гэж Сангийн сайд Ч.Хүрэлбаатар мэдэгдлээ.

Тэрбээр ФАТФ-ын шалгалттай холбоотойгоор намрын  чуулганы нээлтэд оролцоогүй аж. Тэгвэл түүнээс гадна  Монгол Улсын Ерөнхий сайд У.Хүрэлсүх, Монголбанкны ерөнхийлөгч Б.Лхагвасүрэн нар ч ФАТФ-ын төлөөлөгчдийн өмнө тайлангаа албан ёсоор эцэслэн хамгаалахаар сууж байна. 

Төлөөлөгчид  хяналт, шалгалтыг газар дээр нь хийсний дараа ФАТФ манай улсыг Мөнгө угаах, терроризмыг санхүүжүүлэхтэй тэмцэх стратегийн дутагдалтай орнуудын жагсаалтаас гаргахаа эцэслэн шийдвэрлэх юм.

Төв банкны зүгээс байр сууриа илэрхийлэхдээ “ФАТФ-аас өгсөн үүрэг даалгаврыг Монгол Улс сайн биелүүлсэн” гэж байгаа юм. Харин Сангийн сайд "Монгол улс Саарал жагсаалтаас гарах болтугай" хэмээн байр сууриа илэрхийлээд байна.