Монголын явган алхалтын холбоо нь БНЧУ-ын ЭСЯ, Czech Aid байгууллага, Менделийн их сургуультай хамтран “Хүүхэд-гэр бүлийн экологийн боловсролын төгөл” (Kids Eco-Zone) -г Богдхан уулын Зайсангийн амны Дугуй цагааны чиглэлд, ойн чөлөөнд байгуулж өнөөдөр (2024.10.19) нээлтээ хийлээ. Нээлтийн арга хэмжээнд Байгаль орчин, Уур амьсгалын өөрчлөлтийн яамны Гадаад хамтын ажиллагааны газрын дарга Ү.Энхтайван, БНЧУ-аас Монгол улсад суугаа онц бөгөөд бүрэн эрхт Элчин сайд, Ноён Ян Вытопил, Богдхан уулын дархан цаазат газрын хамгаалалтын захиргааны дарга Э.Цогбадрал, Чех улсын Менделийн сургуулийн доктор, профессор Вацлав ПЕЦИНА, Монголын явган алхалтын холбооны тэргүүн Баатарын БОЛОР-ЭРДЭНЭ, салбар холбоодын гишүүд, тэр дундаа бяцхан гишүүд, хүүхдүүд оролцлоо. 

Арга хэмжээний үеэр “Өсвөрийн алхагчид” клуб албан ёсоор нээгдэж, үүсгэн байгуулагч хүүхдүүд албан ёсоор туг, гэрчилгээгээ гардан авч, мөн өсвөрийн байгаль хамгаалагчдын эгнээнд нэгдэцгээлээ. Монголд анх удаа хүүхдүүд нийлж, алхалтын клубээ ийнхүү байгуулснаар байгаль эх дэлхийгээ танин мэдэх, хайрлан хамгаалах, эрүүл зөв амьдралын дадал хэвшлийг бүтээх үйлсэд хувь нэмрээ оруулж байгаа бүтээлч үйл хэрэг болж байна.

Тус төгөлийг Forests for Life төслийн хүрээнд амжилттай хэрэгжүүлсэн бөгөөд хүүхдийн нас, бие, сонирхолд нийцүүлсэн бүтээлч орчин болгон тохижуулж, мэдээллийн самбар, тоглоомуудыг Чех улсад үйлдвэрлүүлэн авчирч байршуулсан юм. Хүүхэд багачууд танхимд бус байгальд тоглоомын идэвхтэй аргаар суралцах, анги хамт олон, гэр бүлээрээ экскурс явган аяллаар очиж байгаль орчин, экологийн талаарх мэдлэг олж авах, сонирхолтой тоглоомуудаар тоглонгоо олж авсан мэдлэгээ баталгаажуулах, байгаль дэлхийгээ хайрлан хамгаалах үйлсэд гар бие оролцох боломжтой болжээ. Унасан мөчрийг ашиглан босгосон урц, ургаа том хад бүхий байгалийн тайз, хус, хуш, нарс, хар модон ой, олон зүйлийн өвс ургамал, уулын горхины хоржигнох чимээ, шувуудын жиргээ энэ бүхний цогц нийцэл бүхий байгальд хүүхэд багачууд маань амьдралынхаа аз жаргалтай мөчийг бүтээх боломжтой болсонд олон эцэг эх, эмээ өвөө нар баяртай байгаагаа илэрхийлж байлаа. Хүүхэд, багачуудын маань баярт мөчийг хуваалцаж МонКонди брэнд, Гудвилл брэнд хамтдаа байж, ирсэн хүн бүрд бэлэг гардуулсан нь байгаль, экологийн боловсролыг дэмжсэн сайн үйлс болжээ.

Байгаль хамгаалалд иргэдийн оролцоо чухал бөгөөд олон нийтийн байгууллагын санаачилга бодит биелэл болж байгаа нь сайшаалтай. Эх орныхоо гэрэлт ирээдүй болсон хүүхдийн төлөө хамтдаа хичээцгээе! Зайсангийн амны ойн бяцхан чөлөөнд “Хүүхдийн эко-боловсролын төгөл”-ийг зорьсон эцэг, эх, хүүхэд, гэр бүлүүд олон байх нь дамжиггүй юм.