Алдарт дуучин Алла Пугачева нийт таван удаа гэрлэсэн хүн. Хамгийн сүүлийн буюу одоогийн нөхөр нь хошин шогийн жүжигчин Максим Галкин гэдгийг бүгд мэднэ. Хосууд аз жаргалтай сайхан амьдарч байгаа тул Алла зургаа дахь удаагаа Хуримын ордонд очихгүй байх гэж фэнүүд нь найдаж байгаа билээ. Ингээд Алла Пугачевагийн таван хуримын ёслолын үеийн гэрэл зургийг сонирхъё.  

Эхний нөхөр – циркчин Миколас Орбакас
 

Алдар хүндийн оргил өөд мацаж эхэлж байсан Аллагийн анхны нөхөр нь өндөр, туранхай литва циркчин залуу Миколас Орбакас байлаа. Анхны харцаар дурласан тэд 1969 онд гэрлэсэн. Пугачева нөхрийнхөө нэрийг авч, Кристина охиноо төрүүлсэн билээ. Хуримын ёслол дээр Алла цагаан даашинзтай, үсээ цагаан цэцгээр чимэглэсэн байв. 1973 онд тэд салсан.

Хоёр дахь нөхөр– кино найруулагч Александр Стефанович
 

Орбакасаас салсан Аллаг сайхан залуус тойрон эргэлдэж байсан тул тэр ганцаардсангүй. Гэхдээ дахин нөхөрт гарах гэж яарсангүй. 1976 онд найруулагч Александр Стефановичтай танилцсанаар байдал өөрчлөгдлөө. Тэд 1977 онд гэрлэсэн бөгөөд нөхөр нь Аллад Москвад орон сууц авч өгсөн юм. Хурим дээрээ Алла үсээ унжуулж, хиппи маягийн өргөн даашинз өмссөн байсан байсан бол нөхөр нь футболка, жинстэй байлаа. Хосууд ямар нэг эсэргүүцэл илэрхийлэх гээд байгаа мэт. Тэд 1980 онд гэр бүл цуцлуулсан юм. Стефанович салсандаа олон жил харамсаж явсан гэдэг.

Гурав дахь нөхөр – продюсер Евгений Болдин
 

Тэд Аллаг нөхөртэй байхад буюу 1978 онд анх танилцжээ. Стефановичаас салсны дараа тэд дотно харилцаатай болсон ч албан ёсоор батлуулах гэж яарахгүй байлаа. Гэвч Коммунист намаас хурим хийлгүй хамтран амьдрахыг нь шүүмжилж эхлэв. Тэд 1985 онд гэрлэж, 1993 он хүртэл хамт амьдарсан. Аллагийн жинхэнэ од болох үе. Яагаад салсан шалтгаан тодорхой бус ч Болдин маш их гомдолтой үлдсэн гэдэг. Хуримын ёслол дээр Алла өвдөгнөөс доогуур урт палаажтай байсан ч нэлээд жин нэмсэн нь илт харагдаж байв. Царайд нь ч аз жаргал харагдсангүй. Хуримын ордонд гарын үсэг зурахдаа Алла шуба, үстэй малгайтай байв.

Дөрөв дэх нөхөр – дуучин Филипп Киркоров
 

11 жил үргэлжилсэн аз жаргалын түүх. Филипп Киркоров бараг хүүхэд байхдаа л Аллад дурласан гэх. Оросын эстрадад хөлөө олж эхэлсэн цагаасаа л алдарт дуучныг эргүүлж эхэлжээ. Алла Борисовна өөрөөсөө 18 насаар дүү бацааныг эхлээд тоосонгүй. Гэвч Киркоров уйгагүй гүйсээр 1994 онд гэрлэж чадсан юм. Хуримын ордонд Алла балахон стилийн цагаан даашинз, малгайтай ирсэн. Харин сүмд болсон ёслолд тэр хувцсаа сольсон байв.  
 

Тав дахь нөхөр – жүжигчин Максим Галкин
 

Филипп Киркоров эхнэрээ Максимтай 2001 онд танилцуулж байсан бөгөөд дараа нь их харамссан гэдэг. 28 насаар дүү Галкинтай танилцсанаасаа хоёр сарын дараа л Алла түүнтэй дотно харилцаатай болсон байна. Тэд 2011 онд гэрлэж, одоо ч аз жаргалтай амьдарч байна. 2017 онд харилцаагаа сүмд очиж, баталгаажуулсан.