“Rio Tinto” компани Аргентин дахь "Rincon" литийн төслийг 825 сая ам.доллароор худалдан авах хэлцэл амжилттай эцэслэгдсэнийг мэдээлэв.

Ингэснээр суурь металлын эрэлт өндөр ч нийлүүлэлт хангалтгүй байгаа үед литийн зах зээлд эзлэх байр сууриа бэхжүүлэхэд томоохон хувь нэмэр болно гэж “Rio Tinto”-ийн Гүйцэтгэх захирал Якоб Стаусхолм онцолж байна. 2021 оны долоодугаар сард хийсэн судалгаагаар энэ уурхай нь 5.8 сая тоннтой тэнцэх хэмжээний литийн карбонатын баттай болон бодит геологийн нөөцтэй гэж тогтоогджээ.

Ирэх 10 жилийн хугацаанд литийн эрэлт жилд 25-35 хувиар өсөх төлөвтэй байгааг “Rio Tinto” компани мэдээлсэн юм. Мөн 2030 он гэхэд нийт автомашины худалдааны 55 хувь нь цахилгаан автомашин байхаар байгаа юм. Энэ нь автомашин үйлдвэрлэгчдэд өдөрт гурван сая тонн лити шаардлагатай гэсэн үг аж. Харин одоогийн байдлаар өдрийн хэрэглээ 350 мянган тонн байгаа юм.

Үүнээс гадна “Turquoise Hill Resources”-ийн 49 хувьд ногдох хувьцааг 2.7 тэрбум ам.доллароор худалдан авах санал бүх хувьцаа эзэмшигчдэд ашигтай гэж “Rio Tinto” компанийн Зэсийн группийн үйл ажиллагаа хариуцсан захирал мэдээлсэн байна.

“Rio Tinto” 2.7 тэрбум ам.доллароор худалдан авах санал тавьсны дараа “Turquoise Hill Resources”-ийн бусад эзэмшигчид үнэлгээгээ нэмэгдүүлэх хариу санал тавиад байгаа юм.