Ц.ГАНЗОРИГ: ХӨЛ ХОРИО ТОГТООХ САНАЛ ХААНААС Ч ГАРААГҮЙ

Нийгэм, Эдийн засаг

Олон нийтийн сүлжээнд "Сонгуулийн дараа хөл хорио тогтоох нь" гэсэн албан бус мэдээлэл таржээ. Үүнд Улсын онцгой комиссын хэвлэлийн төлөөлөгч Ц.Ганзориг сошиал хуудсаараа дамжуулан тайлбар хийлээ.

Тэрбээр "Уучлаарай, хөл хорио тогтоох ямар ч санал хаанаас ч гараагүй. Засгийн газар болон УОК-оос насанд хүрсэн иргэддээ зургаадугаар сарын 15 гэхэд давтан тунг хийж дуусгахыг урьтал болгож байна. Өнөөдөр давтан тунгаа тариулаад 14-өөс дээш хоносон иргэд 36 хувь буюу насанд хүрсэн 3 хүн тутмын 1 нь байна. Бүрэн вакцинжаагүй иргэд халдварт өртөж байгаа эрсдэлийг багасгахаар мэргэжлийн байгууллагууд ажиллаж байна.

Өөрөөр хэлбэл, 1 сая 186 мянган хүүхэд буюу хүн амын 40 хувь нь эрсдэлтэй нөхцөлд байна. Түүнчлэн давтан тунгийн дархлаа тогтоогүй 1 сая орчим хүн эрсдэлтэйд тооцогдож байгаа. Иймээс маскаа зүүж, гараа ариутгаж, хүн хоорондын зай барих нь чухал байна" гэлээ.