Хууль зүй, дотоод хэргийн яамны Төрийн нарийн бичгийн даргаар Улсын бүртгэлийн ерөнхий газрын дарга асан Б.Баасандоржийг томилох тухай У.Хүрэлсүхийн Засгийн газар яригдаж эхлэх үеэс олон нийтэд мэссэж шидэгдэж эхэлсэн юм. Харин энэ мэдээлэлд ямар ч хариулт өгөхгүй байсаар уг албанд томилогдсон Б.Баасандоржийн хувьд Засгийн газрын хэрэг эрхлэх газрын дарга Л.Оюун-Эрдэнэтэй маш ойрын хүн гэлцэх.
Шавилхан биетэй ч дарга томчуудад нүүртэй Б.Баасандоржийн хувьд 2018 оноос Улсын бүртгэлийн ерөнхий газрын даргаар ажиллаж байсан. МУИС-ийн Хууль зүйн сургууль, АНУ-ын Калифорнийн олон улсын их сургууль төгссөн. Эрх зүйч мэргэжилтэй, бизнесийн удирдлагын магистр. 2001 оноос УИХ-ын Тамгын газрын Ерөнхий нарийн бичгийн даргын туслах, Хуулийн хэлтсийн шинжээч, Хууль зүйн байнгын хороонд референт, зөвлөх, ахлах зөвлөх, Хууль зүйн яаманд газрын дарга, 2015 оноос УИХ-ын Хууль зүйн байнгын хорооны ахлах зөвлөхөөр ажиллаж байсан. Төрийн албанд 19 дахь жилдээ ажиллаж байгаа нэгэн.
Нэг ёсондоо энэ салбартаа хийгээ багагүй шахуулж, шавхарсан гэж үнэлэгддэг Б.Баасандоржийн хувьд Хууль зүй, дотоод хэргийн сайдаар ажиллаж байсан нэр бүхий гурван эрхэмд үнэлэгдэнэ гэдэг гайхалтай чадвар юм. Энэ утгаараа тус яамны Төрийн нарийн бичгийн дарга хэмээх зэрэглэлээрээ сайдын дараа жагсах албанд 2020 оны наймдугаар сарын 5-нд томилогдсон.
Засгийн газрын ээлжит хуралдаанаар Хууль зүй, дотоод хэргийн яамны Төрийн нарийн бичгийн даргад Б.Баасандоржийг шинээр томилж, тус яамны Төрийн нарийн бичгийн даргаар ажиллаж байсан Г.Билгүүнийг үүрэгт ажлаас нь чөлөөлж байв. Олон сарын турш уг албан тушаалд яригдаж байгаад очсон, мөн салбарынхаа агентлагт ажиллаж байсан Б.Баасандоржийн хувьд 2019 оноос шинээр мөрдөж эхэлсэн Төрийн албан тухай хуульд тэргүүн түшмэлийн албан тушаалтан буюу яам агентлагийн дарга, яамны Төрийн нарийн бичгийн дарга болоход төрийн албанд 16-аас доошгүй жил ажилласан байх гэдэг шалгуурыг төвөггүй давсан нь ойлгомжтой.
Харин Улсын бүртгэлийн газрын даргаар ажиллаж байх үед нь одоогийн Засгийн газрын хэрэг эрхлэх газрын дарга Л.Оюун-Эрдэнийн санаачилсан Төрийн албанд хийсэн шинэчлэл буюу Эстони улсаас хуулбарлан суурьшуулж байгаа “төрийн албыг цахимжуулах” хөтөлбөрийг Монголд нутагшуулахад ихээхэн анхаарал тавьж ажилласан, Монголын бүртгэлийн системийг хариуцлагатайгаар цахимжүүлсэн зэрэг нь дараагийн Засгийн газрын бүрэлдэхүүнд салбар яамныхаа толгойд гарч ирэх боломж болсон гэх жиг жуг яригдаад намжсан. Ийм нэгэн даруухан төрхтэй, том “кран”-тай нөхөр “төрийн албанд олон жил ажилласан, хашир туршлагатай нэгэн” гэсэн олонхийн дүгнэлттэйгээр Хууль зүй, дотоод хэргийн яамны гал тогоонд эзэн суугаад буй.
Х.Заяа
0 Сэтгэгдэл