Залуусын жагсаалаас үүдэн Ерөнхий сайд төрийн албан хаагчдад тасалгааны метр квадратыг зааж, хэмнэлтийн горим руу шилжих болсныг мэдээлсэн. Энэ дагуу УИХ-ын даргын захирамжаар УИХ-ын харъяа байгууллагын ажилтнууд "Лескус 570", "Ланд 200" маркийн автомашинуудыг албан хэрэгцээнд унахгүй болсон билээ.

УИХ-ын гишүүн Ж.Сүхбаатар хэмнэлтийг өөрөөсөө эхлүүлж, өнөөдөр таксигаар үйлчлүүлж яваа зургаа нийтэлжээ. Тэрбээр өнгөрсөн Даваа гаригт УИХ дахь МАН-ын бүлгийн хуралдаан дээр гишүүд гар утасны төлбөр, тойргоо услах дөрвөн тэрбумыг авдаггүйг онцолсон. Тухайлбал, “Гишүүд дөрвөн тэрбумыг төсвөөс авдаг гэж хүмүүс буруу ойлгодог. Хэзээ ч тийм зүйл байгаагүй. Тэр бол аймаг, дүүрэгт хийх хөрөнгө оруулалтын эрхтэй холбоотой асуудал.

Гишүүд хууль санаачлахдаа 20 сая төгрөг авдаг гэдэг ташаа мэдээлэл. Өмнө нь ч тийм байгаагүй. Гишүүд утасны төлбөрөө төлүүлдэггүй. Бензиний төлбөр сарын хугацаанд 500 мянган төгрөг байдаг. Гишүүд нэг зөвлөхтэй, нэг туслахтай, орон нутагтаа ажиллах хоёр бие төлөөлөгчтэй байдаг. Ер нь УИХ-ын нийт зардал 50 тэрбум төгрөг байдаг” гэсэн хариулт өгч байв. Мөн тэрбээр нэгэн иргэний асуултад "Миний сарын орлого гурван сая төгрөг" гэж хариулсан байна.