У.Хүрэлсүх: Шаардлагатай бол хаах, хорих зэрэг хатуу арга хэмжээ авна. Сэтгэл зүйн хувьд бэлэн байх хэрэгтэй

Нийгэм, Эдийн засаг

Ерөнхий сайд У.Хүрэлсүх өнөөдөр Улсын II төв эмнэлэг болон улсын даалгавраар амны хаалт, хамгаалалтын хувцас хэрэглэл үйлдвэрлэж буй “Мөнхийн тун” үйлдвэрийн үйл ажиллагаатай танилцсаны дараа сэтгүүлчдийг асуултад хариулж, сэтгэгдлээ илэрхийлсэн юм.

 

|

Тэрбээр, Өнөөдөр II эмнэлгийн өргөтгөл, “Мөнхийн тун” үйлдвэрийн хамгаалах хэрэгсэл үйлдвэрлэж буй ажилтай танилцлаа. Улсын хэмжээнд хүчин чадал сайтай лабораторитой болсон байна. Олон төрлийн шинжилгээг эсийн түвшинд хийх нөхцөлийг бүрдүүлсэн нь маш сайн. Мөн II эмнэлгийн нөхцөл байдал муудвал хүндэрсэн өвчтөнийг хүлээн авах 280 ор бэлдсэн байна. ХӨСҮТ, Цэргийн төв эмнэлэг, Хоёрдугаар эмнэлгийн орыг нэгтгэвэл 1000 хүнийг тусгаарлан эрчимт эмчилгээ хийх боломж бүрдсэн байна. Юмыг яаж мэдэх вэ гэж бэлэн байдлыг хангах чиглэлээр УОК-т үүрэг даалгаврын биелэлттэй танилцаж байна. Үүн дээр Яармагт баригдсан 300 ортой Төрөх эмнэлгийг эхний удаад COVID-19-ийн үед ашиглахаар бэлтгэл хангаж байна. Нөхцөл байдал намжвал цаашид үндсэн зориулалтаараа ашиглагдана.

Мөн өнөөдөр “Мөнхийн тун” компанийн амны хаалт, хамгаалах хэрэгслийн үйлдвэртэй танилцлаа. Энэ үйлдвэрийн үйл ажиллагаанд Засгийн газраас дэмжлэг үзүүлж ажиллана.

ХӨСҮТ, Цэргийн төв эмнэлэг, Хоёрдугаар эмнэлгийн орыг нэгтгэвэл 1000 хүнийг тусгаарлан эрчимт эмчилгээ хийх боломж бүрдсэн байна.

Тэрбээр, Монгол Улс COVID-19 цар тахлын тархалтыг хяналтдаа бүрэн авсан. Халдварын тохиолдлууд Монголд гаднаас зөөвөрлөгдөж орж ирж байна. Дотооддоо халдвар илрээгүй. Иргэд зөвхөн гадаадаас ирсэн хүмүүсээс шинжилгээ авч байна гэж бодож болохгүй. Ард иргэдийн дундаас буюу эрүүл мэндийн байгууллагынхан, эмнэлэгт уушгины хатгаагаар эмчлүүлж буй иргэд, хөдөө орон нутгийнхнаас гэх мэтээр түүврийн аргаар шинжилгээ авч, нийт иргэдийн дунд халдвар байгаа эсэхэд тогтмол тандалтын шинжилгээ хийж байна. Тандалтын шинжилгээгээр Монгол Улсад халдвар ороогүй гэсэн дүн гарч байгаа.

Иргэдийнхээ ухамсартай үйл ажиллагааны үр дүнд бид COVID-19-ийг хяналтдаа байлгаж байна. ДЭМБ-ын суурин төлөөлөгч “Монгол Улс өнөөдөр диваажин шиг байна” гэж сайхан үг хэлсэн байна лээ. Бид коронавирусийн халдвараас сэргийлэх арга хэмжээг цаг алдалгүй авч, хил хязгаараа хаах, сургууль цэцэрлэгийг тараах, олон нийтийг хамарсан уулзалт цуглаан зохион байгуулахгүй байх, хөл хорио тогтоох зэрэг өндөржүүлсэн бэлэн байдлын үед авах арга хэмжээг шуурхай хэрэгжүүлсний үр дүнд нөхцөл байдал сайн байна. Нөгөө талаас иргэд амны хаалт зүүгээгүй нэгэндээ шаардлага тавих хэрэгтэй. Иргэн хүн өөрийн болон гэр бүлийнхээ аюулгүй байдлыг хангах үүрэгтэй.

Би Шадар сайд, УОК-ын даргаар 2-3 удаа ажилласан хүн. Аливаа өвчин зовлонгоос хамгаалах хамгийн сайн арга бол урьдчилан сэргийлэх. Амны хаалт тогтмол зүүх, гараа сайн угаах, гадуур сэлгүүцэхгүй байх, тогтоож өгсөн зайг барьж бусадтай харьцах, өөрийнхөө дархлааг сайжруулах хэрэгтэй. Дархлааг сайн байлгахын тулд спортоор хичээллэх, нар салхинд алхах, сайн хоол унд идэхг, ихээр биш чанартай сайн хоол багаар хэрэглэх хэрэгтэй. Цаг тухайдаа унтаж амрах хэрэгтэй. 22.00 цаг гэхэд орондоо орж, 7-8 цагт унтах хэрэгтэй. Хүүхдээ эрт унтуулж сургах хэрэгтэй. Дээр нь архи уувал коронавирусийн халдвараас хамгаална гэсэн яриа иргэдийн дунд гарсан байна лээ. Архи уувал хүний дархлаа суларна.